Nagapabilin nga maayo nga abyan ni Mayor Jed Mabilog si City Councilor Plaridel Nava.
Sa interview sang RMN Iloilo, ginpahayag ni Nava nga iya nakita nga mahuyang si Mayor Jed Mabilog, kag daw halos magluhod na sa tanan nga akusasyon kag pagpanghangkat nga iya gina-atubang subong.
Dugang pa ni Nava , wala sang masandigan si Mabilog bangud ang mga tawo nga yara sa palibot niya loyal lang kon may kinahanglan apang indi na makita ang ila suporta subong.
Sa pihak sini , ginpahayag ni Nava nga nagapabilin siya nga maayo nga abyan ni Mabilog sa pihak sang ila away sang una.
Suno kay Nava, nakahibalo ang alkalde nga halin pa sang una, ginadepensahan na niya ini sa tanan nga isyu kag gina-agwanta ang buyayaw sang tawo madepensahan lang ang alkalde gani nagalaum si City Councilor Plaridel Nava nga mangin eye opener kay Mabilog ang nagakatabo subong agud iya mahibaluan kon sin-o gid ang iya matuod-tuod nga abyan.
Madumduman nga ginpahayag ni City Councilor Plaridel Nava sa iya privilege speech kahapon nga kun hatagan sang due process ni Presidente Rodrigo Duterte si Mayor Mabilog, nakahanda siya magtestigo pabor sa alkalde.
