Anaa na sa 94.17% ang accomplishment rate nga natala sa City Health Office sa nagpadayong Outbreak Response Immunization (ORI) alang sa Sabayang Patak kontra Polio ning syudad.
Matud ni City Health Officer Dr. Lorraine Nery bisan pa man sa kalisod sa pagpahigayon og house-to-house immunization tungod sa COVID 19 pandemic, nabakunahan na sa CHO ang 76,514 ka mga bata nag-edad 0-59 months old.
Target sa CHO nga maabot ang kapin 81,000 ka mga bata alang sa Polio vaccine.
Dugang pa ni Dr. Nery nga nangulo sa house to house ORI campaign ang mga medical officers ug nurses sa CHO, kauban ang mga Barangay Health Workers (BHWs), Midwives ug lakip na ang Barangay Nutrition Scholars (BNS).
Gani man, malaumon ang City Health Office nga makab-ot ang 100% accomplishment rate bisan pa man kung adunay mga ginikanan nga wala mopartisipar. (ACM/Photos courtesy of Budoy Dael, Public Health Nurse-CHO)
