Human sa taas nga katuigan nga gideklarang polio-free ang nasud niadtong tuig 2000, nagpagawas na og health advisory ang kagamhanang lokal pinaagi sa City Health Office (CHO) sa tinguha nga malikayan ang pagtakboy sa maong sakit sa syudad.
Base sa taho sa UNICEF WHO Philippines, ang polio usa ka mananakod nga sakit nga maoy hinungdan sa permanent disability sa tawo ug moresulta sa kamatayon.
Gani man namatikdan na ang maong polio virus sa Tondo (Manila), Davao ug Lanao del Sur diin ang environmental samples napamatud-ang positibo sa Vaccine Derived Poliovirus Type 1 ug 2.
Ang maong mga samples nga nakuha pinaagi sa environmental surveillance sa Research Institute for Tropical Medicine (RITM) and laboratory gikomprima sa Global Specialized Laboratory (GSL) for enteroviruses sa National Institute of Infectious Diseases (NIID) sa nasud sa Japan.
Matud ni Dr. Lorraine Nery, officer in charge sa CHO, nga makuha ang maong sakit pinaagi sa pagkaon o pag-inom sa tubig nga kontaminado sa hugaw sa tawo nga adunay polio virus.
Ang mga sintomas sa maong sakit naglakip sa hilanat, panakit sa kalawasan, pagluya sa parte sa bukton ug tiil ug lisod nga paginhawa.
Alayon niini, nanawagan ang City Health Office sa mga ginikanan nga adunay anak nga nag-edad og 0 hangtud 5 anyos sa pagpabakuna sa 3 ka higayon sa Oral Polio Vaccine ug injection sa Inactivated Polio Vaccine (IPV) dungan sa ikatulong dose sa Oral Polio Vaccine sanglit mao lamang kini ang epektibong paagi aron malikayan ang maong virus.
Mahimo’ng malikayan ang maong sakit pinaagi sa pagbaton og kalimpyo sa kaugalingong panglawas ilabina ang paghugas sa kamot gamit ang sabon ug tubig human mogamit sa comfort room ug sa dili pa mokaon; batasanon usab ang paggamit sa comfort room; moinom lamang sa limpyo nga tubig ug mentinahon ang kalimpyo sa palibot.
Base usab sa taho sa UNICEF WHO aduna lamang estimated 66% polio vaccination nga adunay 3 doses sa bivalent oral polio vaccine ang natala sa nasud sa tuig 2018 kompara sa recommended nga 95% ug 23% lamang alang sa inactivated poliovirus vaccine sa tuig 2019. (ACM)
