Gihingusgan karon sa lokal nga kagamhanan sa Cagayan de Oro ang kampanya sa Clean As You Go kon CLAYGO Ordinance nga gi-aprubahan sa konseho bag-uhay lamang.
Sa maong ordinansa, gimandoan ang matag establisemento nga ipatuman ang CLAYGO policy pinaagi sa pagbutang og mga signages, marking, basurahan ug designated areas alang sa maong lakang.
Tumong sa ordinansa nga maaghat ang katawhan nga hiposon ang kaugalingong kinan-an kung mokaon sa mga restaurants, eatery, fast food chains ug uban pang kan-anan.
Sa nasangpit nga ordinansa, multahan ang mga makasupak kung asa ang 1st offense dunay multa nga usa ka libo ka pesos, dos mil sa ikaduhang offense ug tres mil sa ikatulong offense.
Matud pa ni Konsehal Ian Mark Nacaya, ang pagpatuman sa maong ordinansa nagkinahanglan og insaktong liderato ug disiplina sa katawhan.
Gidugang ni Konsehal Nacaya nga kini mahimong posible pinaagi sa kasamtangang administrasyon ug kooperasyon sa matag indibidwal.
