LA CASTELLANA – Kapin isa ka milyon nga balor sang ram pump ang ginhatag sang Coca-Cola Foundation sa DAFWARBA Farmers Cooperative sa Sitio Dama, Barangay Cabacungan.
Duha ka sahi sang ram pump ang ginhatag, ang isa para sa potable water supply sang Sitio Dama kag ang isa para naman sa irigasyon ukon patubig sa talamnan.
Ang ram pump isa ka pamaagi sa pagsupply sang tubi nga wala na ginakinahanglan pa ang kuryente kondi pressure kag gravity gamit ang mga PVC pipes.
Ang pagturn-over sang ram pump ginpangunahan ni Mr. Winn Everhart ang presidente sang foundation nga ginbaton naman ni Mayor Rhumyla Nicor – Mangilimutan sang La Castellana kag sang Presidente sang DAFWARBA nga si Mr. Daniel Diamante.
Ginpahayag ni Mr. Diamante nga dako gid ang ila pasalamat bangud nangin mahapos para sa pumuluyo sang Sitio Dama ang pagkuha sang ilimnon nga tubig bangud sang ram pump indi kaangay sadto nga nagapanag-ob pa sila sang masobra isa ka kilometro para gid lamang nga may makuha nga matinlo nga ilimnon nga tubig. Tuman pa ka delikado sang ila sitwasyon sadto bangud may tabukon pa sila nga suba kag kun mag-ulan nagabaha.
Ang ram pump ang naga supply sa 70 ka mga puluy-an sang Sitio Dama.
Samtang ang ram pump naman para sa irigasyon ang mahimo makasupply sang tubig sang kapin 40 ektarya nga katubuhan kag napulo ka ektarya nga humayan.
Sa pihak nga bahin nagpasalamat naman si Mayor Mangilimutan sa Coca-Cola Foundation bangud sang sini nga proyekto.
Iya pa ginpaathag nga kun ang iban nga mga alkalde naga dumili sa pagbaligya sang Coca-Cola products sa ila mga fiestas kag festivals, ang La Castellana wala diri naga-upod bangud tuman ka dako sang ginahatag nga proyekto sang Coca-Cola Foundation sa iya banwa kag maka benipisyo gid ang mga pumuluyo ilabi na sa kaumhan.
