Mapasalamaton si Cagayan de Oro City Police Office kon COCPO Spokesperson Supt. Mardy Hortillosa sa gihatag kanila nga commendation sa konseho ning dakbayan.
Gibutyag ni Supt. Hortillosa nga nagpamatuod lamang kini nga nakita sa syudad ang ilang pagpaningkamot ilabina ang ilang kampanya batok sa illegal nga druga nga usa sa hugtanong gipapuhag kanila ni Presidente Rodrigo Duterte.
Dugang pa ni Hortillosa nga pinaagi niini mas ila pang tarungon ang ilang pagserbisyo sa katawhan ug sa syudad ug paningkamotan pang mas moubos ang ihap sa ilang madakpang mga drug pusher hangtod hingpit kining mawala.
Giangkon usab niini nga ning panahona, masulti ni Supt. Hortillosa nga aduna gayod pag-ubos sa ihap sa ilang gakadakpang mga tigpayuhot ug tiggamitan sa illegal nga druga.
Apan kung ang hisgotan mahitungod sa kung miubos ba ang volume sa illegal nga druga dili niya kini makompirmar tungod kay dili sila ang adunay katungod sa pagdeterminar niini.
Tungod niini, padayong mihangyo si Spokesperson Hortillosa sa katawhan nga tabangan sila sa pagtudlo niadtong mga tawong drug pusher, aron nga ilang himuon ang surveillance ug operasyon.
Mahinumdoman nga giduso ni Konsehal Zaldy Ocon sa sesyon sa konseho sa iyang pagbalik kagahapong adlawa ang paghatag commendation ngadto sa kapolisan ug P-DEA 10 tungod sa ilang exemplary anti-drug campaign ning dakbayan.
