Malipayong mibisita si Commissioner Rosario B. Sagadal sa National Labor Relations Commission Regional Arbitration Branch 10 sa 8th Division o NLRC-RAB-X aron tan-awon ang mamahimo nilang umaabot nga opisina sa Bukidnon nga ipahimutang sa 2nd Floor sa New National and Provincial Building, Kaamulan Capitol Compound, Malaybalay City, Bukidnon kagahapon, Hunyo 29, 2020.
Kauban ni Commissioner Sagadal sa pagbisita silang Executive Labor Arbiter Rammex C. Tiglao-RAB-X, Labor Arbitration Assosciate Jeremy Cabrera, Labor Arbiter Joyce L. Seno-kho, Labor Arbiter Abdul Azis U. Metmug ug Labor Arbiter Jean Domaboc-Munez. Sila giabi-abi ni Provincial Administrator Atty. Jay S. Albarece kauban si Provincial Engineer Albert D. Yulo ug giubanan ngadto sa ilang mamahimong bag-ong opisina diin kini mamahimong NLRC RAB-X Satellite Office.
Matud pa ni Atty. Albarece nga ang maong satellite office dako kaayo ug ikatabang sa atong probinsya ilabi na sa mga katawhan nga adunay problema sa suhulan gumikan kay pwede na silang mokunsulta niini ug sa maong buhatan na usab i-hearing ang mga kaso dinhi sa Bukidnon. Mas mapadali na usab ang pag-follow-up sa ilang mga kaso gumikan kay dili na kinahanglan nga moadto pa sila sa dakbayan sa Cagayan de Oro.
Mapasalamaton usab kaayo ngadto kang Bukidnon Provincial Governor Jose Ma. R. Zubiri, Jr. ang mga kadagkuan sa NLRC-RAB REGION-X sa pagpanguna ni Commissioner Sagadal gumikan sa paghatag kanila ug lugar aron sila makapahimutang sa ilang satellite office ug mapaduol ang ilang pagserbisyo sa katawhan ilabi na sa mga taga-Bukidnon.
