Ginapasiguro ni Bacolod Lone District Congressman Greg Gasataya nga madamo sang safety nets sa House Bill (HB) No. 6875 ukon ang proposed Anti-Terrorism Act of 2020 kasunod pagkontra sang kadamuan sa sini nga hagna.
Si Congressman Gasataya ang nagboto pabor sa hagna apang may yara siya sang reservation sang ini ang nakalusot sa Kamara de Representantes sang Mierkoles.
Nahibaluan nga madamo karun ang mga nagapatigayon sang hublag-protesta matapos nga ini ang nakalusot sa Kamara kag pirma na lang ni Presidente Rodrigo Duterte ang ginahulat agud nga ini ang mangin kasuguan.
Sa idalom sang hagna, mapriso sang 12 katuig ang sin-o man nga magapamahog kag magahimo sang terorismo kag mangin ang mga maga-enganyo nga maghimo sini.Kaina sang aga, may pila ka grupo nga nagprotesta sa guwa sang opisina ni Congressman Gasataya sa ciudad sang Bacolod bangud sa pagpabor sini sa hagna.
Ginpahayag ni Gasataya nga indi naman pag-ikonsiderar nga terorismo ang mga advocary protest, pagkontra sa panindugan sang gobyerno, expression sang civil kag political rights.
Samtang, gintadlong naman sang Kamara ang pinal nga resulta sang binotohay sa pagpasar sang hagna sa: 168-Yes, 36-No,kag 29-Abstention, gikan sa 173-31-29 nga naguwa sang Mierkoles.
[image: image.png]
