Gikondena sa Cagayan de Oro Press Club ang bag-ong pag red tag sa mga miembro sa media.
Sa press statement nga gipagawas ni Mr. Manny Jaudian, ang presidente sa Cagayan de Oro Press Club, gipadayag niini nga gikondena sa COPC ang pag red tag sa mga kaubanan sa media kung asa 4 niini mga miembro sa COPC.
Ang mga gi-red tagged mao sila Froilan Gallardo, ang vice president for print sa COPC, Board of Director Cong Corrales, ug mga miembro nga sila Joey Nacalaban ug Pamela Jay Orias.
Niadtong Pebrero 28, samtang anaa sa kapamilya network ang mga sakop sa media atol sa gipahigayong solidarity protest sa renewal sa franchise, aduna usa ka bond paper size nga poster ang gipadala nga nag akusa sa mga miembro sa media nga lakip sa Communist Party of the Philippines-New People’s Army-National Democratic Front.
Sa parehong adlaw, adunay gipang apod-apod nga poster sa Capitol Ground.
Gumikan niini, gitawag sa presidente sa COPC nga usa ka cheap propaganda ang gihimong pag red tagged sa mga sakop sa media ug nanawagan sa kapulisan ug militar nga imbistigahan ang maong kaso.
