BACOLOD CITY – (1st Update) Masubo nga balita subong gid lamang nga hapon ang naagyan sang isa ka pamilya nga taga Poblacion, Pototan, Iloilo nga kon tani maga-paliwa liwa sa isa ka highland resort diri sa syudad sang Bacolod.
Patay ang pito ka tuig nga bata sang mag-asawa nga Peñaflorida samtang pilason man sila matapos nga disgrasya nga matumbahan sang daku nga sanga sang mahogany ang ila gina-sakyan nga Toyota Fortuner (YP 6278) kolor itom.
Natabu ang insidente pasado ala-1:30 sa atubang gid sang Bacolod Boys Home sa Brgy. Granada, Bacolod City sa diin ini sila ang padulong kon tani sa Campuestohan Highland Resort.
Ginbawi-an sang kabuhi ang Ken Marion Peñaflorida, 7 yrs old, bata sang konsehal sang banwa sang Pototan, probinsya sang Iloilo.
Suno kay Potatan Sanggunian Bayan Member Kent Roger, 34, nagpadulong sila sa Campuestohan Resort para sa selebrasyon sang birthday sang iya amay kag iya nga misis.
Samtang, naka-angkon sang bukol sa ulo ang isa pa ka bata nga lalaki ni SB Peñaflorida kag naka-angkon naman ang minor injury sa mata ang iya asawa nga si Maureen Peñaflorida, 35 yrs old apang nakaguwa naman sang gindala sa Bacolod Doctor’s Hospital.
Nahibalu-an nga napulo tanan ang sakay sang Toyota Fortuner sa diin safe naman ang iban nga pasahero.
