Sa interview sa DXDC RMN Davao kang Police Major Al Anthony Gumban, Chief of Police sa Mati City Police Station, iyang gisaysay nga ayha pa nahitabo ang pagpusil sa biktimang si Daryl Delagua, 33 anyos taga Barangay Don Martin Marundan, Mati City, aduna na matud pa kini nadawat nga hulga sa iyang kinabuhi gikan sa kabanay sa iyang asawa.
Matud sa pulis nga sa ilang imbestigasyon, duna matud pay laing babae ang biktima, rason nga nagdesisyon ang magtiayon nga magbulag nalang, ug gikasuko sa kabanay sa babae ang nahitabo nga miresulta sa pagkaguba sa ilang kaminyoon, diin nasayrang sila dunay duha ka mga anak.
“Base sa among pagsubay, nagpirmahanay na sila sa iyang asawa (alang) sa initial nga separation. Mao to nasuko ang relatives sa side sa iyang asawa,” sulti sa pulis.
Nasayrang riding in tandem ang mipusil sa biktima nga daling gidala sa ospital apan nakabsan ra usab kini sa iyang kinabuhi. Ginatutokan usab karon sa kapulisan ang nakuhang closed-circuit television (CCTV) footage sa lugar nga makatabang sa pag-ila sa mga suspetsado.
RadyoMaN Kirby Manzon
