Niubos ang crime rate sa Northern Mindanao sukad sa paglingkod ni Pangulong Rodrigo Duterte.
Sa interview sa RMN Malaybalay ngadto kang Police Superintendent Lemuel Gonda ang spokesperson sa Police Regional Office 10, gibutyag niini nga aduna gayoy pagkunhod sa ihap sa mga kriminalidad sa rehiyon 10.
Matud ni Gonda nga kasagarang gipanghitabo nga krimen kaniadto adunay kalambigit ang illegal nga droga.
Sigun niya nga adunay koneksyon ang paggamit sa illegal nga droga sa pagpanghold-up, pagpangawat, pagpatay ug uban pang kriminalidad.
Mayorya matud pa sa krimen nga nahitabo tungod sa paggamit niini.
Samtang gipahayag usab sa Bukidnon Provincial Police Office nga base sa ilang datos adunay pag -ubos usab sa crime rate sa probinsya.
Matud ni PSI Jessel Longakit ang spokesperson sa PNP Provincial Command sa interview sa RMN nga adunay dako gayod nga kalainan kung ikumpara kaniadtong wala pay war on drugs.
Dungan niini gi-aghat sa PNP ang publiko nga isumbong sa ilang buhatan kung aduna may mamatikdan nga naghimo ug illegal nga mga kalihukan ilabina kung ang mga nalambigit niini anaa nagtrabaho sa gobyerno sama sa kasundaluhan ug kapulisan aron mahatagan gilayon kini nila ug tukmang aksyon.
Gisiguro usab nila nga dili ibulgar ang identity sa mga musumbong alang sa serugidad niini.
