Davao City – Nag-unang problema karon sa Barangay Salaysay sa distrito sa Marilog ang comfort rooms labaw na diha sa mga sitio ug mga purok nga layo na sa sentro diin halos dili na mabisita sa mga opisyales sa barangay aron masusi ang matuod nilang kahimtang ug suliran.
Sa datos nga giluwatan ni Barangay Captain Robert Itdang, dili moubos sa 200 ka panimay napalgang walay kaugalingong CRs ug sagad anaa na sa lagyong dapit kun mga sitio ug mga purok.
Sumala pa ni Itdang, sagad sa mga pamilya nga walay comfort room mao kadtong walay klaro nga panginabuhi kun pangita maong maglisod usab sila og palit og toilet bowl.
Mientras ang uban nagdumili sa pagsanong sa awhag sa Barangay Council nga maghimo na sila og kaugalingong mga restrooms aron kalikayan ang bisan asang pagpagawas sa ilang mga hugaw.
Gani, napuno kun dagsa og mga requests gikan sa mga residente ang Barangay Hall aron mangayo og ayuda sama sa mga water-sealed bowls aron makahimo na sila og kasilyas sarang kaadtoan panahon nga muabot ang sugo sa lawas kun ‘call of nature.’
Apan tungod kay kulang ang pondo sa barangay, dili tanan nahatagan og toilet bowl kun kubeta o inidoro hinoon ang gihimo sa uban mao nga nagkalot na lamang sila og yuta ug maoy gihimong temporaryo nga CR.
Nasayran nga 7M ka mga Pilipino sa tibuok nasud nasayrang walay kaugalingong kasilyas hangtud karong panahona diin kabahin na niini ang 200 ka pamilya sa may Barangay Salaysay.
Nanawagan karon si Itdang sa kagamhanan nga hatagan og dugang pundo ang kabarangayan sa tibuok nasud aron adunay pupaigong kwartang ikapalit og sanitary bowls ang mga Barangay Councils alang sa ilang mga ginsakpan nga walay kaugalingong pasilidad susama niini.
RadyoMaN Joel Viray
