Davao City – Anaa na karon sa ikatulong adlaw ang depopulation kun culling sa mga baboy sa Davao Occidental aron malikayan ang pagkatag sa African Swine Fever (ASF) sa apektadong mga lugar.
Sa interbyu sa DXDC RMN Davao kang Noel Provido, Spokesperson sa Department of Agriculture (DA)-XI, gibutyag niini adlawng Huwebes, Pebrero 6, 2020 anaa na sa 50% o 3,564 ka mga baboy ang naihaw ug nalubong gikan sa kinse ka mga barangay sa Don Marcelino, Davao Occidental.
Gipasabot ni Provido nga angay nga hutdon pag cull ang maong mga baboy aron makapahigayon og disinfection human sa maong depopulation.
“So atong buhaton diha i-total ano gyud na siya para i-break nato ang life cycle sa virus. Then after that, mag disinfect ta for thirty days,” saysay ni Provido.
Kahinduman nga gisugdan niadtong Miyerkules, Pebrero 5, 2020 ang depopulation diin anaa sa kapin 7,000 ka baboy ang target sa culling way labot kadtong namatay na daan sa ASF.
RadyoMaN Kirby Manzon
