Nadawat sa Police Regional Office kon PRO 10 ang daghang flag gikan sa Ayala Foundation ug chooks to go.
Kini ang gibutyag ni Pol. Lt. Col. Mardy Hortillosa, ang Spokesperson sa PNP region ten.
Matud ni Lt. Col. Hortillosa, nga adunay programa ang Ayala nga ‘’maging magiting campaign’’ diin tumong niini nga ipabutang sa kasingkasing ug hunahuna ang paghatag og respeto sa nasudnong bandila.
Dugang pa niini nga dili lang ang PNP ang gihatagan sa mga flag, kondili apil na ang ubang ahensiya.
Nasayran nga 170 ka flag ang nadawat sa kampo alagar, ug kini ipanghatag ngadto sa 106 ka polis station sa lalawigan, headquarters, City police office, ug mobile force ug provincial mobile force.
Samtang dili basta basta lang nga ibutang sa usa ka buhatan ang nasangpit nga mga flag.
Matud ni Pol.Lt. Col. Mardy Hortillosa sa PNP region ten, nga adunay simbolo niini ug gihimo kini aron nga matatak sa hunahuna sa katawhan, nga kini ang bandila nga gibuhisan sa kinabuhi.
Dugang pa ni Hortillosa, nga ang mga flag nga kuspaw nga nabutang sa mga polis stations kinahanglan pulihan og bag-o, ug sunogon kini pinaagi sa tradisyunal nga pamaagi.
