General Santos City—Gipasaan nag kaso sa Alabel Municipal Police Station ang duha ka mga lalaking responsabli sa pagpanglugos sa 23 anyos nga babayeng dunay deperensya sa panghuna-huna nga natigayon sa may barangay Dumulok, Alabel, Sarangani province niadtong nakalabayng adlaw.
Giila ni PSI Benjie Ancheta ang mga suspek nga silang Dimple Isam, 23 anyos, residenti sa Purok 3, Dumulok, Alabel ug Jason Linog, legal age, residenti sa samang lugar.
Nasayran nga alas 3:00 sa kabuntagon dihang nahuman ug inum ang duha didto sa ilang lugar, ilang nakit-an nga miagi ang biktima nga itago lang ug Myra, ila kining gisundan padulong sa creek dayon didto na gilugos.
Human ug lugos gihagbong sa duha ka mga suspek ang biktima sa creek dayon gibyaan sa pagtuong patay na ang biktima. Naningkamot ang biktima nga makauli sa ilang balay dayon misumbong sa iyang mga ginikanan kansa maoy nireport sa buhatan sa Alabel Police Station.
Didto na gisikop ang mga suspek human positibong gitudlo sa biktima. kasong lugos ug frustrated homicide ang kasong gipasang-at batok sa mga suspek.
