BACOLOD CITY – Ginpasakaan na sang kaso ang isa ka dalaga nga yara sa listahan sang Top 10 nga nagabaligya shabu sa Bacolod.
Si Charmy Palandras, 23 anyos ang edad, pumuluyo sang Purok Star Apple, Brgy. 27, Bacolod City ang ginpasakaan na kaso sang Police Station 4 nga violation sang Section 5 kag 11 sang Republic Act 9165 ukon illegal drugs.
Ini matapos nga nadakpan si Palandras sa buy bust operation nga ginpatigayon sang police sadtong nagligad nga January 6, 2018 las 11:45 sang gab-i.
Nakuha sa posesyon sang suspek ang isa ka elongated plastic sachet sang ginapatihan shabu, mga drug paraphernalia, cash nga 1,200 pesos kag marked money.
Sa pihak nga bahin, duha man ka mga soltero ang ginpasakaan sang kaso sa illegal possession of firearms.
Ini sila nakilala nga sanday Jury Gequillana, 22 anyos ang edad sang Purok Fortune Town kag Christian Legaspi, 18 anyos ang edad, pumuluyo man sang Brgy. Estefania.
Nadakpan sang mga barangay tanod sanday Christian kag Jury nga may dala nga improvised firearms ukon sulpak kag mga bala sang M16 armalite rifle.
Ini sila ang gilayon nga ginturn-over sa Station 4 kag ginpasakaan na sang kaso./dyHB BACOLOD
