Davao Eagles, rank 6 sa Palaro 2023

Davao City – Dili ordinaryo ang nahimong pagpaningkamot ug garbo nga gihatag sa Davao Eagles human sila nabutang sa rank 6 sa paghuman sa Palarong Pambansa 2023 sa Marikina City nga gipahigayon gikan July 29 hangtud August 5, 2023.

Subay sa Official Medal Tally sa maong multi-sport event as of August 5, 2023 nauli sa Davao Region ang 21 gold, 18 silver ug 28 bronze medals.

Sumala ni Jenielito Atillo, spokesperson sa Department of Education (DepEd) – XI, pinakataas kini nga pwesto sa Davao Region sa Palaro human nga nag-champion ang delegasyon sa Palaro 2003.

”That’s the highest so far after nag champion ta sa Tubod, Lanao Palaro niadtong 2003,” gipadala nga mensahe ni Atillo sa DXDC RMN Davao.

Atol sa Palaro, gilayong nadawat sa mga atleta nga nakakuha’g medalya, ang ilang cash incentives diin P25,000 alang sa gold medalist; P5,000 sa silver medalist; ug P3,000 sa bronze medalist.

Karong tuiga, nakuha sa National Capital Region Athletic Association (NCRAA) ang kampeonato.

Samtang, ipahigayon ang Palarong Pambansa 2024 sa Cebu City.

RadyoMaN Kirby Manzon