Davao City – Nagpabilin sa gihapon nga usa sa adunay pinakataas nga kaso sa HIV-AIDS ang syudad sa Davao gani nahilakip kini sa ‘Top 5 contributors’ sa tibuok Pilipinas.
Matud ni Dr. Jordana Ramiterre, head sa Davao City Health Office Reproductive Health and Wellness Center (RHWC), mokabat sa 2,902 ka mga kaso ang natala sa Epidemiology Bureau sa tibuok Davao Region niadtong January-June 2019.
Sa maong datos, 157 niini kababayen-an mientras 2,745 niini ang pinakadaghan nga gilangkuban sa kalalakin-an diin mo-average sa 38 incidents matag bulan ang ilang natala.
Dugang ni Ramiterre, sagad apektado mao kadtong nag-edad og 25-35 anyos gisundan sa 15-25 age bracket diin 14 anyos ang pinakabata nga na-record sa CHO.
Matud sa maong opisyal nga taliwala sa daghang mga programa ug kampanya nga ilang gipatuman, problema sa behavior gihapon ang gilantaw karon nga major factor nganong padayong nagkataas ang HIV incidence sa nasud.
Padayong giawhag ni Ramiterre ang pag gamit og contraceptives aron mahalikay nga matakdan ning naasoyng peligrosong balatian.
Karong December 1, i-komemorar ang ‘World AIDS Day’ uban ang temang ‘Ending the HIV/AIDS Epidemic: Community by Community.’
RadyoMaN Jason Amisola
