Kalibo, Aklan — Kwarta ag cellphone rong nahabuoe sa sambilog sa daywa ka mga babaye nga nabiktima it hold-up kabii sa F. Fernandez St., Capitol Site, Estancia, Kalibo, Aklan.
Ro biktima nakilaea kay Merinesa Orgelio y Bandala, 21-anyos, residente it Poblacion San Jose, Romblon ag presente nga gaboard sa nasambit nga lugar samtang naga-review para magbuoe it Licensure Examination for Teacher.
Sa panaysayon it mga biktima sa Kalibo PNP, nga kabii halin sanda sa boarding house para magbakae it suea ag tag sanda eon nagapanikangon pabalik gulpi sanda nga inabangan it daywa ka mga uwa makilaeang eaeaki sakay it motorsiklo. Nanaog rong backrider ag pinaeapitan ro biktima ag gintutukan it uwa masayuri nga bagay ag binuoe ro anang bag kon sa siin dikato nakasueod rong kwarta nga more or less 1,000 pesos ag cellphone.
Matapos nga mabuoe rong bag hay madasig man nga pumaeagyo rong mga suspek sakay it motorsiklo sa indi masayuran nga direksyon.
Bangud man sa sobrang kahadlok uwa gid maitsurahi ko mga biktima ro mga suspek ag pati ro description it motorsiklo rason blangko pa makaron rong Kalibo PNP pero sigidas man ro ginapatigayon nandang pag follow up ko nasambitan nga insidente.
