Daywa ka mga kaso it pagpangbuno nagtuhaw sa besperas it Paskwa

Daywa ka mga kaso it pagpangbuno rong nagtuhaw kabii sa besperas it Paskwa.
Una nga insidente hay natabo sa Brgy. Silakat Nonok, Lezo, Aklan.
Rong biktima nakilaea kay Michael Castillo, 27-anyos samtang rong mga suspek hay ro magmaeanghod nga sanday Jovanie Taborda, 26-anyos ag Joslyn Taborda sa legal nga edad ag tanan residente it nasambit nga lugar.
Sa imbestigasyon it Lezo PNP nga nagapauli eon kunta ro biktima halin sa ilimnan hay imaw ra inabangan ni Joslyn ag may komprontasyon nga natabo, ginhambaean pa nana it mga maeain ro biktima ag pati ro anang pamilya.
Habatian mat-a raya ni Jovanie, anang inadtunan ag binuno ro biktima nga tinama sa tuo nga abaga.
Insigida nga nadakpan rong mga suspek ag posible magapangatubang it kasong frustrated homicide.
Samtang,nakaangkon mat-a it tama it pagbuno sa waeang kilid rong sangka 21-anyos nga eaeaki matapos nga mabun-an kabii sa San Jose St., Poblacion, Malinao mga alas 10:40 kabii.
Ro biktima nakilaea kay Jasper Inamac, residente it Brgy. Cogon, Malinao.
Sa imbestigasyon naga guwa nga kabii hay may mga grupo it kabataan nga nagatueotambay sa plaza ag may una ta kara nga naghaboy it ice water nga idto umadto sa andang nahamtangan.
Na tuonan man nga naga agi rong grupo ko biktima ag sanda ra hay ginkumpronta ko grupo it suspek ag dayon may nagtuhaw rong kumosyon ag nabun-an rong biktima.
Matapos rong insidente hay nagdaeaeagan sa nagkaeain-eain nga parte rong mga suspek.
Sa makaron hay padayon nga ginabueong rong biktima sa Aklan Provincial Hospital.
Daywa sa mga person interest makaron rong buyot it Malinao PNP ag paga usuyon pa rong iba para nga i-presentar sa biktima para sa pag identify.
Under investigation pa rong motibo gid sa nasambit nga insidente.

mmmm.pptx