Ibajay, Aklan – Sambilog rong patay matapos nga magsunggaban kabii rong daywa ka mga motorsiklo sa national highway kung Brgy. Aquino, Ibajay, Aklan.
Rong namatay hay nakilaea kay Christian Mangilog, 19-anyos ag residente it Brgy. Ondoy sa nasambit nga banwa samtang ro anang kasunggaban hay nakilaea kay Henon Troy Tupaz, 28-anyos ag taga Ajoy, Iloilo.
Suno kay PO3 Ian Sastre it Ibajay PNP nga kabii hay nakabaton sanda it tawag nga may una nga aksidente sa lugar ag pag-abot nanda hay gin impormahan sanda nga ro mga biktima hay gindaea eon sa Ibajay District Hospital.
Sa imbestigasyon nanda naga guwa nga rayang si Tupaz hay nagabiyahe pa Caticlan para mag uli sa anang asawa sakay it anang RUSI 125 nga motorsiklo hay may nag overtake man nga sangka RUSI 125 nga motorskilo sa sangka saeakyan ag rato rong sumunggab kana (head on) nga ginamaneho ni Mangilog.
Matapos nga magsunggaban gin pang apok ra sanda sa andang mga motorsiklo.
Si Mangilog hay gin deklara nga dead on arrival sa Ibajay District Hospital bangud sa anang lastro sa ueo, waea nga tuhod ag iba pang parte it eawas samtang si Tupaz hay nakaangkon it lastro sa waea nga batiis, dahi, waea nga mata ag ueo.
Nasayuran nga rayang si Mangilog hay nag-adto sa sangka birthday pero naabot imaw idto hay nakainum man eagai ag uminum pa gid.
Parehong uwat helmet rong daywa ag uwa pat lisensya si Mangilog.
Sa makaron hay padayon pa rong imbestigasyon it Ibajay PNP angot sa nasambit nga insidente.
