Banga, Aklan – Daywa ka mga wanted person rong gin aresto kahapon sa banwa it Banga sa magkaseparar nga lugar ag kaso.
Una nga gin aresto si Kenny Natabio, 30-anyos it Brgy. Pagsanghan matapos nga mag guwa ro anang warrant of arrest ko September 16, 2019 sa kasong Homicide
Rong warrant hay may Criminal Case No. 15020 nga ginpaguwa ni Hon. Judge Bienvenido P. Barrios Jr., presiding judge it RTC 6 Branch 3, Kalibo, Aklan.
Nagtaeana it pyansa rong korte nga P 120,000.00 para sa anang temporaryong kahilwayan.
Matandaan nga rayang si Kenny hay suspek sa pagpatay sa anang sariling igmanghod nga si Lina Natabio ko nagtaliwan nga Mayo 4, 2019 it gabii kung sa siin nakita eon lang raya nga naga hamyangon ag may lastro sa ueo.
Base sa confession it suspek sa Banga PNP nga samtang nagapauli sanda sa andang baeay hay nagkaangkon sanda it mainitan nga diskusyon kung sa siin nakasambit it maeain nga kataga si Lina nga ginkaakig it suspek.
Sa intensyon nga paeagon eamang ro biktima nagbuoe raya it butong sa daean ag binunae ro biktima samtang nagatalikod apang raya hay naabot ag inigo sa anang ueo.
Bangud sa pag-usig it anang konsensiya kabangdanan nga raya hay nag-aku sa ginhimo nga krimen.
Natigayon nga ginbaton it piskalya ro kasong Homicide kay Kenny ku Mayo 14, 2019 kung sa siin bangud naging regular filing ro pagpasaka it reklamo, temporaryo raya nga ginpahilway.
Nasayuran nga dati man nga nakulong si Kenny Natabio sa kaso man nga homicide nga anang nakumiter ku 2011 sa banwa it Banga.
Samtang, gin aresto man kahapon sa Brgy. Badiangan si Jimmy Rano, 72-anyos bangud sa kasong Rape.
Gin aresto imaw pinaagi man sa bisa kung warrant of arrest nga may Criminal Case No. 15022 nga ginpaguwa ni Hon. Bienvenido P. Barrios Jr., presiding judge RTC 6, Branch 3, Kalibo, Aklan nga may petsang Setyembre 13, 2019.
Uwa it pyansa nga gintaeana rong korte para sa anang temporaryong kahilwayan.
Matandaan nga gin reklamo rong nasambit nga lolo it paghimueos sa sangka menor de edad.
Ro nasambit nga mga akusado hay temporaryo detained sa lock up cell it Banga PNP ag iga-turn over hinduna sa korteng natungdan.
