Davao City – Mireklamo sa Talomo PNP ang usa ka Rico Castor Gallardo, 33 anyos, residente sa Piapi Boulevard ning siyudad gumikan nakuhaan ang sulod sa iyang bagahe sa dihang iya kining nabilin sa desk sa Davao City Overland Transport Terminal (DCOTT) sa Ecoland, Davao City.
Sumala sa complainant, ang bag dala sa iyang igsoong babaye ug dalaon unta ngadto sa probinsiya sa dihang nahibilin kini kaniadtong Enero 1 sa baggage checking counter sa maong terminal.
Ang sulod matud pa sa maong bag mao ang mga durian candies, air jordan flight shoes, baby sandals ug Ollie Kiddie shoes.
Sa pagkasunod nga adlaw, Enero 2, gikuha sa complainant ang nahisgutang bag didto sa DCOTT apan gi-endorse na ngadto sa usa ka dispatcher nga ginganlang Benny delos Santos ug gi turn over ngadto kang PO3 Jawadin, tourist police nga naka assign sa DCOTT.
Sa pagkuha sa maong bag allegedly nausab kuno ang timbang niini ug sa iyang pag-abli nawala na ang mga pagkaon apil usab ang sapatos nga mokantidad tres mil ka pesos.
Buot ipatala sa complainant ang kalidad sa serbisyo sa maong buhatan partikular sa nahitabong pagkawala sa mga gamit sa iyang bagahe.
RadyoMaN Paul Canono
