DILG XI: Kaayohan sa barangay unahon inay honorarium

Davao City – Naghangyo ang Department of the Interior and Local Government (DILG- XI) sa mga buot magpapili isip Barangay Officials sa Davao City, karong October 30, 2023 nga unta sila duna’y prinsipyo ug baruganan ug dili lang tungod sa honorarium, kundi ang tinud-anay nga pagpanerbisyo sa katawhan.

Sa pakighinabi sa DXDC RMN Davao kang DILG XI Regional Director Alex Roldan, giklaro niya nga manglahi ang kantidad sa honorarium sa matag Barangay, kay dili man tanan parehas ang income ug ang ihatag sa mga opisyales dili molapas sa 55% nga allocation gikan sa buwis sa gobyerno matag tuig.

Segun ni Roldan, dili malikayan sa mga kandidato nga mag-apas sa honorarium nga maangkon, tungod aduna man usad sila’y trabaho sa Barangay nga ilang gi-serbisyohan, apan naglaum siya (Roldan) nga unta unahon og huna-huna ang ikaayo sa tanan.

“Natural naa gyud ng honorarium para sa mga SK, sa mga kagawad, kapitan apan angay hunahunaon nato, hangyuon nato nga tong mga managan nga secondary lang na siya himuon dapat, unahon jud ang plano kung unsay pinakamaayong ayuhon/himuon sa iyang barangay,” segun ni Roldan.

RadyoMaN Ivy Parido