Davao City – Subling gipasabot sa Davao City Disaster Risk Reduction and Management Office (CDRRMO) nga dili luwas ang syudad sa Davao gikan sa bisan unsang matang sa katalagman sama sa linog.
Matud ni CDRRMO Head Rodrigo Bustillo, matag mulihok ang faultline nga anaa sa kayutaan ug ilawom sa kadagatan sa Davao Oriental, apil makasinati og pagtay-og ang dakbayan.
Segun ni Bustillo, ang Pilipinas nag-atubang sa halapad nga kadagatan sa Pasipiko kung asa nagtapok ang dili mumenos sa 400 ka bulkan nga maoy hinungdan sa mga nahitabong linog sa rehiyon sa Asya.
Sumala samaong opisyal, mas angayang pangandaman og maayo sa mga Dabawenyo ang paglihok sa mga faultlines nga ania dinhi sa atong dakbayan tungod sa gikusgon nga mugnaon sa makalilisang nga pagtay-og.
Dugang ni Bustillo nga dili makamatay ang linog apan ang magbutang sa peligro sa kinabuhi sa mga tawo mao ang kakulang sa kahibalo sa luwas nga pamaagi ug ang pagtaranta panahon sa emerhensiya.
Maong awhag sa CDRRMO Head ngadto sa tanan nga seryosohon ug isilsil sa hunahuna ang mga pagbansay nga ginahimo pinaagi sa mga earthquake drills.
Ug apil usab sutaon ug sayron ang lahi-lahi nga matang sa tingog sa mga emergency sirens kay mao kini ang magsilbing giya sa mga mahitabong katalagman sama sa linog nga muhampak dinhi sa atong lokalidad.
RadyoMaN Joel Viray
