Ginpatigayon eon kaina sa Magsaysay Park rong distribution it financial assistance sa mga nasunogan sa Kalibo Public Market.
Base sa masterlist it Municipal Social Welfare Development Office (MSWDO) hay may 296 ro nalista nga totally damage ag 41 ro nalista sa partially damage.
Suno kay Mrs. Lolly Espino, MSWDO it banwang Kalibo nga rong financial assistance nga ginpanupod sa mga nasunogan hay halin sa 5% Calamity Fund it LGU-Kalibo ag bulig man nga P 300,000 halin kay Davao City Mayor Sarah Duterte.
Bali ro mabaton it mga nakalista sa totally damage hay P6,000 halin sa LGU ag P 1,000 halin sa bulig ni Mayor Duterte nga may kabilugan nga P 7,000.00.
Samtang sa mga partially damage hay makabaton sanda P 1,000 halin sa LGU ag P1,000 halin kay Mayor Duterte nga may kabilugan P 2,000.00.
Ginklaro mat-a ni Espino nga rayang bulig hay para pangpiyan-piyan sa pamilya it mga nasunogan samtang uwa pa sanda makabalik sa normal nga pagnegosyo ag bukon raya it para sa pagpatindog it uman ko andang negosyo.
Ro pagpanupod hay hasta alas 5:00 makarong hapon ag sa indi makahingabot hay pwede man sanda mag adto sa treasurers office para i-claim.
