BACOLOD CITY – Ginklaro sang Department of Health Region 6 nga nagapabilin sa COVID-19 Alert Level 4 ang ciudad.
Ini kasunod sang pagsalangisag sang iban sa pagpati nga yara lamang sa Alert Level 2 ang ciudad kadungan sang paghalog sang mga malls kun sa diin nakasulod ang mga menor de edad.
Sa interview sang DYHB, ginpahayag ni Dr. Bea Camille Natalaray, ang designated spokesperson sang DOH Region 6, nga base sa IATF Resolution 146-A, ang Bacolod City yara sa Alert Level 4 humalin Nobyembre 1 tubtob 14.
Paathag sini, ginbasehan sang IATF ang assessment sa two-week growth rate, average daily attack rate kag healthcare utilization sa ulihi nga duha ka semana sang bulan sang Oktubre.
Apang sa weekly assessment sa una nga semana sang bulan sang Nobyembre, naguwa nga sulod sa Alert Level 2 ang ciudad kag ini naman ang mangin basehan sang IATF para sa mangin alert level sang Bacolod sumugod sa Nobyembre 15.
Pagklaro ni Natalaray, sa pihak nga ginatugutan na ang inter-zonal travel sa idalom sang Alert Level 4, ang mga menor de edad lakip na ang may co-morbidities, nagabusong kag naga-edad 65 anyos pasaka ang limitado lamang sa “essential travels”.
