NEGROS OCCIDENTAL – Sa Sagay City, patay ang driver sang motorsiklo kag back-rider sini nga anum ka tuig nga bata matapos mabunggu-an sang isa ka pick-up sa Bangga Tanepis, Hda. Amparo, Brgy. Old Sagay, Sagay City.
Patay ang driver sang motor nga si Renzo Dimzon, 19 anyus, residente sang banwa sang EB Magalona.
Samtang, napatay man ang anum ka tuig nga bata nga si Kienron James Vistar, sang Brgy. Taba-ao, Sagay City samtang pilason man ang amay sang bata nga si Keith Vistar, 23 anyus.
Sa imbestigasyon sang Sagay City PNP, nag-overtake ang motor sa kurbada nga bahin sang Bangga Tanepis, Hda. Amparo sa diin wala sini nakit-an nga naga-sugata nga pick up nga gin-maneho naman ni , 47 anyus sang Brgy. Poblacion 1, Saga City.
Bangud sa impact kag kadasigon sang motor, nagtabog naman nga bata nga nag-resulta sa kamatayon sini samtang patay man ang driver sang motorsiklo.
Sa banwa naman sang Ilog, detained karon sa police station ang driver sang Ceres bus matapos maka-bunggo sa traysikol sa National road – Crossing Ambush, Brgy Manalad, banwa sang Ilog, pasado alas 6, Domingo sang aga.
Patay ang pasahero sang traysikol nga ginkilala sa kay Bruno Estoya, 37 anyus, residente sang Brgy. Camugao, syudad sang Kabankalan.
Pilason naman ang isa pa ka pasahero sang traysikol nga si Alano Matunding kag driver nga si Franciso Tapucon, 45 anyus, tanan residente sang Kabankalan City.
Ang driver naman sang Ceres nga detained sa karon sa Ilog Police Station amo si Joan Doronilla, 40 anyus sang Brgy. Ara-al, La Carlota City.
Suno sa ILOG PNP, nga halin sa sur padulong sa Norte ang traysikol sang agawon sini ang linya sang Ceres rason sa pagluntad sang amo nga insidente./dyHB BACOLOD
