Padayon karong gipangita sa kapolisan sa Agora Police Station ang draybe sa motorela, nga misulay paglugos kagahapon sa kadlawon sa usa ka 30 anyos nga dalagang call center agent ning syudad.
Gibutyag ni Police Chief Insp. Allan Curato, ang hepe sa Agora Police Station nga sakay ang maong dalaga sa gimanehong motorela sa wala mailang suspek gikan sa Gusa paingon unta sa iyang trabahoan, dihang miliko kini sa karaang eastbound terminal sa Brgy. Gusa.
Pag-abot matud pa sa bakanteng luna duol sa Jeti gasoline station sa maong dapit, nagpasumangil ang driver nga mangihi apan kalit niining gihawiran ug gituok ang biktima, kinsa iyang gisumbag sa kuto-kuto.
Apan nagpa-patay patay ang dalaga hinungdang gumikan sa kahadlok sa driver nga iya kining nahinaykan, gilayon na lamang niining gikuha ang bag sa dalaga nga adunay sulod celfon, mahalong kwentas, kwarta ug ubang gamit dayong sibat.
Samtang….
Naklaro usab sa biktima ang pangalan sa operator sa maong motorela, kinsa nakapangayog tabang sa gwardya sa Jeti nga mao usab ang mipahibalo sa Agora Police Station sa nahitabo sa dalaga.
Tungod niini, gilayong mihimo og operasyon ang kapolisan hinungdang ilang nakit-an ang motorela nga gidrayban sa suspek sa Brgy. Gusa ug atol sa imbistigasyon ilang natultolan ang balay sa responsable.
Apan pag-abot sa balay sa suspek ang inahan lamang niini ang ilang naabtan, human nga misibat na kini sa wala masayrang dapit.
Gibutyag usab ni Chief Insp. Curato nga posibli karong Lunes, ila nang ipasaka ang kaso batok sa suspek kinsa padayon pang gipangita ning panahona.
By; Radyoman Aiza Enloran and Radyoman Ellah Baculio
