Sarangani Province—Malipayon ang dul-an tresentos (300) kabuok mga driver-operator sa probinsya sa Sarangani human nga nakapailalum sila bag-uhay lang sa Transport Drivers’ Academy Training gipahigayon sulod sa Kapitolyo sa Sarangani.
Segun ni Mr. Nestor Lumawig, chairman sa Technical Working Group kon T.W.G. sa Road Safety Advocacy og siya pud ang private representative ngadto sa Regional Development Council sa Rehiyon Dose, kinahanglan nga mupailalum ang tanang public utility driver dili lang ang mga taga-Sarangani Province, kadtong namasada, tungod kay epektibo sunod tuig dili na matud pa makapa-renew sa lisensya og prangkisa, samot nga dili legal nga maka-maneho, kung dili muagi sa maong driver’s academy. Pinasubay kini sa bag-ong guidelines sa DOTr o Department of Transportation og sa LTFRB kon Land Transportation Franchising and Regulatory Board.
Sa liderato ni Pangulong Rodrigo Duterte, gusto lamang matud pa maniguro ang gobyerno nga may saktong kahibalo ang mga pampublikong drayber sa saktong pamalaod sa pagpadagag sakyanan, apil na ang pag-respeto sa isig ka-drayber.
Sulod sa usa ka adlaw nga seminar, tudluan og subling ipasabot ang mga topiko may kabahin sa basic traffic rules and regulations, road safety, driving courtesy, traffic and directional signs, anger management, road rage, og daghan pa. Og kini mahitabo matag tuig.
Matud ni Lumawig, dili lisod pasaron ang eksam kung maminaw lang sa mga lecture og basi man usab ang mga pangutana sa aktwal nga experience.
Daghan na matud pang programa ngadto sa transport sector sa Sarangani. Gani, mapasigarbuhon nga gipabalo niini nga basi sa ilang talaan sa regional statistics sa PNP, ang Sarangani Province ang adunay pinakaubos nga natala nga aksidente sa kadalanan taliwala sa upat (4) ka probinsya og lima (5) ka syudad sa Region 12. Pinaka-luwas matud pa agian ang mga national highway sa Sarangani. (News From: Governor’s Office of Sarangani Province)
