Davao City – Pabor ang pipila ka mga bus drivers nga nahinabi sa DXDC RMN Davao sa mando ni Pres. Rodrigo Roa Duterte nga himoong mandatory ang drug test sa mga bus drivers ug releyabo sa mga long-distance bus drivers.
Sumala ni Ging-Ging Del Campo, usa ka bus driver, usa ka maayong lakang kini aron malikay sa disgrasya ang mga pasahero sa ilang pagbiyahe.
Matud ni Del Campo, ang dili maayo niini sa higayon mahuwasan na mahugno ang lawas ug mawad-an sa kondisyon.
Samtang gibutyag usab sa laing bus driver nga si Sol Mayor nga pabor siya sa maong sugyot tungod ug alang sa luwas nga pagbiyahe.
Sa pikas bahin, giklaro usab sa Land Transportation Office (LTO-XI) nga ginahimo na nila ang sorpresang drug test sa mga bus drivers kaniadto’ng wala pay mando nga gipagawas si Pres. Duterte.
Matud ni Jun Antonio, Law Enforcement Division Chief sa LTO-XI, ginahimo nila ang surpesang drug test sa mga terminal panahon sa Kalag-kalag, Semana Santa ug panahon sa Pasko.
Nunot niini gipanawagan sa LTO-XI sa tanang mga drivers nga dili gayud mogamit sa gidiling droga samtang nagmaneho aron disgrasya malikayan tungod kay kinabuhi sa mga pasahero ang ilang gidala.
RadyoMaN Bernard Pantallon
