Gisikop sa kapulisan sa Carmen ang usa ka drug pusher atol sa drug buy bust operation sa Zone 11, Upper Carmen ning syudad sa Cagayan de Oro kagahapon sa hapon.
Matud ni Senior Inspector Dennis Gutierrez Quindara, Hepe sa Cogon Police Station nga ang suspek mao si Jomer Espinosa, alyas Chombian, 31 anyos, minyo nga residente sa nasangpit nga lugar.
Gibutyag ni Quindara nga nakuha sa kapulisan gikan ni Espinosa ang duha ka pakite sa gituohang shabu nga mokabat sa 0.30 gramos nga mokantidad sa tres mil pesos.
Lakip sa nakuha sa mga police gikan sa maong suspek ang 500 pesos nga buy bust money ug cellphone.
Ang maong drug buy bust operation gisaksihan ni Carmen barangay kagawad Bernel Taguic
Karong adlawa, ang maong suspek gitakda nga pasakaan na og kasong paglapas sa Republic Act 9165.
