Ginpasiguro sang Department of Social Welfare and Development Field Office ukon DSWD 12 ang emergency assistance sa pamilya sang nabawian sang kabuhi kag pilason sa nagluntad nga road-side bomb explosion sa Sibsib, Tulunan, North Cotabato sang Enero 27.
Nahibaluan nga 1 ang patay kag 6 ang pilason sa nasambit nga insidente nga nagluntad sa abandona nga ticket booth kag nadalahig ang unit sang YBL matapos nga nagpondo tungod may nagpanaug nga pasahero sini.
May-angot sini, suno kay DSWD 12 Regional Director Cezario Joel Espejo, nga magahatag sang medical kag burial assistance ang ahensya kag nagcoordinate na ang social workers sa pamilya sang mga biktima..
Suno kay Rosemarie Alcebar, provincial social welfare and development team, gin-assess na nila ang kinahanglanon sang pamilya sang mga biktima.
Ginpahayag ni Alcebar nga ang intebensyon sang ahensya ang sa idalom sang Assistance to Individuals in Crisis Situation (AICS), isa ka programa nga magabulig sa indibidwal kag pamilya nga makabangon sa wala ginalauman nga panghinabo ukon krisis.
Sa idalom sang AICS, ang DSWD ang magahatag sang medical, educational, burial, kag transportation assistance sa mga informal sector, mga pigado, marginalized, vulnerable, kag disadvantaged individuals.
