Sa interview sa RMN Malaybalay ngadto kang NCTU Regional Coordinator Joel Gabatan, gibutyag niini nga ang pagtaas sa pletihan napanahon na ug dugay na nilang gipangayo.
Matud niya nga niadtong Marso aduna silay petisyon nga giduso sa LTFRB nga nangayo og P5 nga dugang pletihan apan P1 ra ang gihatag niadtong Hunyo ning tuiga. Apan tungod sa laing P1 nga dugang pletihan nga na-aprubahan sa LTFRB niining bulan sa Setyembre anaa na sa P2 ang kinatibuk-ang dugang pletihan karong tuiga.
Nagpasabot kini nga ang minimum rates anaa na sa P12 gikan sa P11 alang sa jeepneys samtang anaa sa 14 pesos gikan sa 12 pesos alang sa mga public utility vehicles nga gikategorya sa gobyerno isip moderno.
Matud ni Gabatan nga laumang mo-epekto ang dugang pletihan karong Oktubre 4.
Nanawagan usab siya sa mga kaubanang draybers nga dili maningil og dugang pletihan kung wala pay nadawat nga taripa.
