Drayber ug mag-uuma, nasikop sa drug buy-bust operation sa kapulisan

26
Gibalhog na sa prisuhan ang usa ka drayber ug usa ka mag-uuma human nga nadakpan sa pagpayuhot sa illegal nga droga atol sa gipahigayong drug buy-bust operation sa mga kapulisan pasado alas 12:30 kaganihang kadlawon didto sa Purok-1B, Barangay Poblacion, Dangcagan, Bukidnon.

Gipangunahan sa mga personahi sa Dangcagan Municipal Police Station ang maong operasyon inubanan sa ubang mga operatiba sa probinsya ug sa rehiyon nga miresulta sa pagkasikop nilang Junerl Pardillo, alyas Jongjong, 31 anyos, minyo, drayber, ug residente sa Purok-1, Kisawa, Kibawe, Bukidnon ug ni Christopher Villanueva, 27 anyos, ulitaw, mag-uuma, ug residente sa Purok-4, Barangay Cebuano Group, Wao, Lanao, Del Sur diin naaktuhan sa mga operatiba sa pagpamaligya og illegal nga drogang shabu.

Napalit gikan sa mga suspek ang usa ka pakete sa gituohang drogang shabu samtang nakompiska ang laing duha pa ka pakete niini nga mutimbang og 0.30 gramos ug gibana-banang mukantidad og P2,000.00.

Nakompiska usab ang usa ka coin purse, mga drug paraphernalia, P500 bill nga buy-bust money, ug usa ka unit sa kolor pula nga Rusi single motor.

Gidala sa presinto sa kapulisan sa Dangcagan ang mga nadakpang suspek alang sa tokmang disposasyon samtang iturn-over sa PNP Provincial Forensic Unit sa Malaybalay City ang mga nakompiskang ebidensya alang sa eksiminasyon.

Mag-atubang sa paglapas sa RA 9165 kon Comprehensive Dangerous Drugs Act of 2002 ang mga dinakpang suspetsado.

Facebook Comments