Koronadal City–Luwas na sa makuyaw nga kahimtang ang duha ka sekyu sa manag-laing establisemento sa Koronadal City nga silang Erly Stanley Naval, 51 anyos, residente sa Brgy. Palian Tupi Sot. Cot. ug si Naser Midtimbang, 24 anyos, residente usab sa Prk.Magsaysay,Brgy.GPS Koronadal kansa gipangpusil sa wala pa mailhing mga suspek atubangan mismo sa ilang gitrabahoan niadtong adlaw’ng Sabado.
Sumala pa ni Police Lieutenant Rey Sotelo Deputy Station Commander sa Koronadal PNP nga nakaangkon ug samad pinusilan sa taas nga bahin sa iyang paa si naval samtang si naser naigo kini sa ubos nga bahin sa iyang tiil.
Saysay pa sa opisyal nga mohawa-ay na unta ang mga biktima niadtong higayona apan kalit lang matud pa dunay miabot nga duha ka lalaki ug diretso gipangpusil ang mga nasampit samtang paspas man usab nakasibat ang mga suspek papalayo sa lugar.
Pamahayag man usab ni Lieutenant Sotelo nga sa pagkakaron nagpadayon pa ang ilang imbestigasyon gumikan kay blangko pa sila sa motibo sa pagpusil sa duha ka sekyu.
Gani ilaha usab sayron sa mga biktima kung duna ba kini nakalaban ug mga bahad nga nadawat sa ilang kinabuhi ayha pa nahitabo ang krimen aron duna silay lead sa ilang imbestigasyon.
Asoy usab ni Sotelo nga lantawon nila ang lugar kung duna bay mga CCTV camera nga gipangmontar gumikan kay duol lamang kini sa merkado publiko sa syudad sa Koronadal.(Reynald Timario)
