Nagsinumbagay ang duha ka kagawad sa Barangay Cugman atol sa gihimo nilang sesyon niadtong Hulyo 15 ning tuiga.
Matud ni Kagawad Elmer Cotiamco, nga nagsugod ang tanan human niya gikwestiyun ang financial transaction sa barangay.
Dugang pa ni Kagawad Cotiamco, nga sa tanang Kagawad sa Barangay, siya lang ang wala malakip sa Bids and Awards Committee.
Nasayran nga gisumbag ug gikumot ang iyang totoy ni Kagawad Mario Diaz – ang Chairman sa Komitiba sa Infrastructure, human niya gipahibalo sa tanan atol sa sesyon, nga tungod kay wala na siyay gihawiran nga komitiba, aduna siyay katungod nga mosusi, ilabi na sa komitiba nga naghawid sa budget sa panudlanan sa barangay.
Apan tungod kay giaparta na sila sa mga kaubang kagawad, wala na siya makabalos og sumbag.
Sa iyang kabahin, gibutyag ni Kagawad Mario Diaz nga unang namikil si Kagawad Elmer Cotiamco.
Matud ni Kagawad Diaz, nga dili tinuod nga iyang gikumot ang totoy ni Cotiamco, tungod kay igo lang siya nga mituko sa dughan niini, human kini miaksyon og dasmag kaniya.
Dugang pa ni Diaz, nga bakak ang alegasyon nga nangumot siya og totoy, tungod kay dili kini miss universe nga buhatan sa ingun.
Nasayran nga unang nanumbag si Cotiamco apan wala kini makaigo kang Diaz.
Samtang, giangkon ni Barangay Cugman Kapitan Wendelyn Escobia nga iyang gihukasan og komitiba si Kagawad Elmer Cotiamco.
Matud ni Kapitan Escobia, kini tungod kay iyang nakita nga sugod sa pag-ingkod hangtud karong panahona, wala niini malihok ang iyang komitiba kay nagpasulabi ang hunahuna.
Nasayran nga usa sa gihawiran niini nga komitiba mao ang Comm. On Urban Poor, ug ang Comm. On Ways and Mean.
Dugang pa ni Kapitan Escobia nga iyang gihatag kini kaniadto ni Kag. Cotiamco tungod kay iyang nakita nga aduna kini kapas nga mohawid niini.
Apan ang nahitabo, imbes nga lihukon niini ang iyang trabaho, sa tanang adlaw ug tanang oras nagsige na hinoon kini og pangitag bikil.
Dugang niini, gitanum sa hunahuna ni Kapitan Wendilyn Escobia sa Barangay Cugman sukad sa iyang pag-ingkod, nga siya ang Kapitan nga dili mahimong diktaran sa bisan kinsa.
Matud ni Kapitan Escobia, nga duha ka klase ang iyang buot ipasabot sa pagdiktar sa usa ka tawo, ug kini ang pagpasipsip, ug ang pagpanghadlok.
Dugang pa ni Kapitan Escobia nga alang kaniya, gidiktaran siya ni Kagawad Cotiamco pinaagi sa pagpanghadlok sama sa pagsumbong sa Ombudsman, pangkasuhan, ipa-media, ug uban pa.
Apan bisan gamay, wala siya matandog ug mahadlok niini, tungod kay nasayud si Kapitan Escobia nga usa lamang kini ka stratehiya aron siya madiktaran.
Giklaro ni Kapitan Escobia nga sa karon siya na ang subling mihawid sa komitiba nga iyang gihatag kaniadto ni Kag. Cotiamco.
