Davao City – Duha ka managlahing shooting incident ang nahitabo kagahapong adlawa sa managlahing lugar dinhi sa Rehiyon 11.
Unang biktima naila nga si Emer Minaling, 44-anyos ug residente sa Brgy. San Jose, Samal kinsa gipusil sa Sitio Maag, Peñaplata, Island Garden City of Samal.
Sa inisyal nga imbestigasyon sa IGACOS PNP, gikan sa sabungan ang maong biktima diin pasado alas-5:00 sa kahaponon kalit kining gipusil sa duha ka mga suspetsado samtang kini papauli na.
Igo tumong sa likod nga bahin ang biktima diin sa pagkahagba niini, gitiwasan pa kini og pusil diin adunay tulo ka mga basyo sa bala sa .45 nga pistol ang narekober sa crime scene.
Gani, suspetsa sa kapulisan nga may kalabutan kini sa sabong ug sa pagkakaron aduna na silay persons of interest.
Sa pikas bahin, gipusil sab alas-7:00 kagabii sa Purok 15 Brgy. Poblacion Magsaysay Davao del Sur ang usa ka Rudy Balandan alyas Bobong, 35-anyos, minyo ug residente sa Purok 18, Poblacion Magsaysay, diin kini nakahiagom og multiple gunshot wounds sa ulo ug lawas nga parte niini gani miresulta sa iyang hinanaling kamatayon.
Sa pagkakaron, padayon sa gihapon sa paglusad og imbestigasyon ang duha ka kwerpo sa kapulisan alang sa pagkasikop sa mga suspetsado ingon man sa motibo sa pagpusil-patay sa mga biktima.
RadyoMaN Jason Amisola
