Deklarado na nga persona non grata ang Communist NPA Terrorists (CNTs) sa duha ka mga lungsod dinhi sa probinsya sa Zamboanga del Sur.
Ang duha ka mga lungsod nga dugang nga mideklara niining bag-ohay pa lamang mao ang lungsod sa Tukuran ug lungsod sa Dumalinao. Kini human sa namugnang Municipal Task Force to End Local Communist Armed Conflict (MTF ELCAC) atol sa panagtigom sa Joint Municipal Peace and Order Council ug Municipal Development Council.
Parehong suportado ni Tukuran Mayor Macario Tingson ug Dumalinao Mayor Junaflor Cerilles ang Executive Order Number 70 ni Presidente Rodrigo Duterte nga naninguha sa pagmintinar sa kahapsay ug kalinaw pinaagi sa paghatag sa mga serbisyo ngadto sa mga apektadong dapit arun hingpit na nga mahunong ang kaguliyang sa nasud.
Gipaniguro usab ni 53IB Commanding Officer Lt Col Marlowe Patria nga magpadayun sila sa ilang kusganong tinguha sa pagwagtang sa mga CPP-NPA nga naglihok sa tibook probinsya ug padayung magsuporta sa pagmintinar sa kahapsay ug kalinaw dinhi sa probinsya sa Zamboanga del Sur.
