Detinado karon sa Police Station 3, Agora ang duha ka magsoon human masapon sa aktong illegal nga nanabong sa Purok 3, Quarry, Barangay Gusa ning siyudad mga alas 2:50 kagahapon sa hapon.
Nasayran nga usa ka concern citizen ang mitawag sa Agora police station kinsa misumbong nga dunay nagpahigayon sa illegal nga tari-tari sa maong lugar hinungdan nga dali kining girespondehan sa operatiba sa maong buhatan nga giunhan ni PO3 Jose Xason Belisario.
Didto nasapon ang magsoon nga silang Eduardo Ablon, 45 anyos, minyo, welder nga taga Purok 3A, Gusa ug si Edmundo Ablon, 33 anyos, minyo, labor ug residente sa samang dapit.
Nakaikyas usab ang mga kauban sa dinakpan lakip na ang Cueme, Largador, Bettor, gaffer ug monton.
Ang mga dinakpan gikustodiya na karon sa Police Station 3, Agora samtang giandam na ang kasong paglapas sa Presidential Decree 1602 batok sa duha ka suspects.
