Ramon Magsaysay, Zamboanga del Sur – Duha ka kalampusan ang naangkon sa kapulisan sa Ramon Magsaysay dihang malampusong nadakpan sa managsunod nga operasyon sa Barangay Katipunan nga sakop sa maong lungsod ang duha ka wanted person kinsa pulos residente sa nagkadaiyang dapit sa Northern Mindanao.
Alas 9:20 kaniadtong Sabado sa gabie nasikop sa kapulisan didto sa P1, Brgy. Katipunan, Ramon Magsaysay, ang usa ka pinangita sa balaod nga nailang si Ronildo Mendoza Abing aka “RONEL ABING”, 39 anyos, minyo, usa ka driver ug residente sa P3, Brgy. Taglimao Centro, Cagayan de Oro City.
Gidakop si Abing gumikan sa gahom sa ALIAS WARRANT OF ARREST sa kasong pagpangawat kon THEFT nga gipagawas ni Judge CELESTINO V. DICON, MCTC Judge sa 10TH MUNICIPAL CIRCUIT TRIAL COURT OF RAMON MAGSAYSAY-SOMINOT-MIDSALIP kaniadto pang November 20, 1996 (22 na ka tuig).
6mil pesos ang girekomendang pyansa sa Korte bugti sa temporaryong kagawasan sa dinakpan.
Sa misunod nga adlaw, dakpan usab sa kapulisan ang usa ka wanted person nga residente sa lungsod sa Talakag, probinsya sa Bukidnon kagahapon sa buntag.
Usa ka manhunt operation ang gilusad sa mga personahe sa Ramon Magsaysay MPS didto sa P3, Brgy. Katipunan, Ramon Magsaysay, ning probinsya human nasayrang anaa sa maong dapit ang wanted person nga si HERMIE SARIT SUMAYANG, 46 anyos, minyo, usa ka mag uuma kinsa residente sa Sitio Tiga-Ason, Brgy. Dominorog, Talakag, Bukidnon.
Gidakop si Sumayang pinasikad sa gahum sa ALIAS WARRANT OF ARREST alang sa kasong ACTS OF LASCIVIOUSNESS nga gipagula ni Judge CELESTINO V. DICON, ang MCTC Judge sa 10TH MUNICIPAL CIRCUIT TRIAL COURT OF RAMON MAGSAYSAY-SOMINOT-MIDSALIP kaniadto pang Enero 24, 2001 (19 ka tuig).
12 mil ang girekomendang pyansa sa Korte bugti sa temporaryong kagawasan sa dinakpan.
Ang duha ka mga dinakpan ang kasamtangang gibalhog sa Ramon Magsaysay MPS detention cell samtang nagpaabot sa commitment order nga ibalhin sa Ramon Magsaysay District Jail (BJMP).
