Gisikop sa kapulisan ug kasundalohan sa Region 10 ang duha ka miyembro sa New Peoples Army o NPA nga mga suspek sa pag-atake sa Binuangan Municipal Police Station niadtong Disyembre 3, 2017 nga gikasamad sa upat ka mga pulis.
Kini ang gibutyag ni Police Supt. Ariel Philip Pontillas, Chief of Police sa Gingoog City Police Station sa interview sa dxCC-RMN Cagayan de Oro.
Unang gisikop sa Barangay 26, Gingoog City, mga alas 2:10 kagahapon sa hapon mao ang 48 anyos nga si Gerry Valmoria Basahon, minyo ug taga Purok 4, Barangay Binakalan, Gingoog City.
Samtang mga alas 2:40 sa hapon gisikop sa Purok 4, Barangay San Luis, Gingoog City ang 52 anyos nga si Carmelita Dorado, minyo ug nailang si alyas Tata Dorado.
Si Basahon ug Dorado puros nag-atubang og kasong 2 counts of attempted murder ug frustrated murder ug temporaryong makagawas kung makapiyansa og tag 120-mil pesos matag kaso.
Gisikop ang duha ka wanted persons pinaagi sa hiniusang pwersa sa Gingoog City Police Station sa pagpangulo ni Supt. Ariel Philip Pontillas – Chief of Police, Binuangan Municipal Police Station sa pagpanguna ni Police Insp. Lorimer Zagado Cabil – Chief of Police, mga personahe sa Regional Mobile Force Battalion 10, 1001st MC sa pagpangulo ni Police Insp. Yves S. Sembrano, Regional Intelligence Unit 10 sa pagpanguna ni Police Chief Insp. Ryan O. Igualdo ug mga miyembro sa 58th Infantry Battalion Alpha Coy, 4th Infantry Division, Philippine Army sa pagpanguna nila 1st Lieutenant Jefferson M. Mariano ug 2nd Lieutenant Vivencio Layaog.
