Davao City – Human mibalik ang nasudnong kapulisan sa kampanya kontra droga gilayon nakabuena mano ang Sasa PNP og duha ka mga drug pushers sa gilusad nga buy bust operation sa managlahi nga lugar ug adlaw.
Unang nasikop sa Station Drug Enforcement Team sa Sasa PNP mao si Rey Navarro, 38 anyos, PUJ Driver ug nagpuyo sa Panabo City, Davao del Norte.
Gisaka ang operasyon sa may bus stop Panacan ning siyudad alas 11:00 sa gabii niadtong Sabado diin nakuha gikan sa possession sa suspek ang tulo ka drug sachet sa shabu, cellphone ug 500 pesos mark money. Wala usab naka-ipsot gikan sa otoridad si John Angelo Canoy Jr., 21 anyos, ulitawo ug residents sa Barangay San Francisco, Panabo City.
Gidakop sa mga otoridad ang suspek human gitunol ang usa ka sachet sa shabu sa pulis nga nagpailang buyer nga adik. Nasakmit gikan sa suspek ang laing sachet ug 500 pesos nga mark money. Ang suspek usa sa mga nagpayuhot sa AOR sa Sasa PNP rason sa paglusad og buy bust sa Purok Durian, Barangay Sto. Nino, Panabo City, alas 10:00 sa gabii resulta sa pagkasikop ni Canoy.
Ang duha pareho gipasakaan og kaso subay sa kalapasan sa Republic Act 9165 kun Comprehensive Dangerous Drugs Act of 2002.
RadyoMaN Joel Viray
