Giangkon ni Police Supt. Lemuel Gonda ang Spokesperson sa PNP-10 nga adunay duha ka hubog nga sakop sa 4th ID Philippine Army ang misakay sa bus nga miresulta sa kahadlok ug kabalaka sa mga pasahero.
Tungod niini, daling gihunong sa driver ang bus ug gireport sa Manolo Fortich Police Station sa Bukidnon ang duha ka hubog nga silang Private First Class Brian Anco ug Private First Class Armand Gentiles nga puros sakop sa 41st Division Reconnaissance company ubos sa 403rd Brigade sa Bukidnon hinungdang miresponde gilayon ang kapolisan og gipakanaog ang duha ka hubog.
Apan aduna matud pay usa ka batan-ong lalaki nga upaw, kinsa mikalit pagsumbag sa usa ka sundalo hinungdang nahitabo ang komosyon.
Tungod niini, nasumbagan sa duha ka hubog nga sundalo ang mga mirespondeng polis nga miaparta usab kanila.
Gibutyag ni Gonda nga kasohan unta sa direct assault ang duha ka hubog nga sundalo apan mihangyo ang personahe sa 4th ID Philippine Army nga pasayloon na lamang alang sa humanitarian consideration.
Tungod niini, gipasaylo nila PO2 Mark Torregosa ug PO1 Laurence Macalos ang duha ka sundalo ug mihimo silag resolusyon nga dili na lamang mopasaka og kaso.
Wala na usab masayri kung kinsa kadtong misumbag nga sibilyan sa usa ka sundalo tungod na usab kay giprayoridad sa kapolisan nga dili makasibat ang duha ka sundalo.
Dugang pa ni Supt. Gonda nga dili gyod malikayan nga tungod sa kasuko sa pipila ka sibilyan adunay uban nga mohimo sa pagdapat sa masikop sa kapolisan.
By: Ellah Baculio
