Pinaagi sa Inquest Proceedings pormal nang gipasakaan og kaso kagahapon sa Criminal Investigation and Detection Group kon CIDG sa kasong Criminal sa Bukidnon Provincial Prosecutor’s Office ang duha ka suspect nga nasapon nga naghupot sa armas ug granada nga walay panugot sa gobyerno.
Si Police Major Bryan Panganiban, hepe sa CIDG Misamis Oriental Provincial Unit ang mipaila sa mga suspect nga silang Sabas Rasuman alyas Macabinta, 53 anyos, usa ka drug surrenderee ug Junrell Bernabe, 31 anyos, taxi driver nga taga Sitio Magpait, Barangay Indulang, Talakag, Bukidnon.
Si Rasuman nga taga Sitio Guimbaloron, Barangay Dagumbaan, Talakag, Bukidnon ug Bernabe ang parehong gidakop sa Joint Operation sa CIDG, Bukidnon Regional Mobile force Battalion ug Bukidnon Provincial Mobile Force Company mga alas saisa sa buntag niadtong Martes pinasikad sa “Oplan Paglalansag Omega” sa Philippine National Police.
Gidakop ang duha ka mga suspect pinaagi sa search warrant nga gi-issue ni Judge Mirabeaus Undalok, Executive Judge sa Regional Trial Court Branch 43 sa Gingoog City nga iyang gi-issue niadtong Hulyo 10.
Gidakop ang duha ka suspects didto mismo sa balay ni Rasuman sa Sitio Guimbaloron, Barangay Dagumbaan, Talakag, Bukidnon.
Matud ni Panganiban nga kasong illegal possession of fire arms and Ammunitions ug kasong illegal possession of Explosive ang ilang gipasaka batok sa duha ka mga suspects.
Kini tungod sa ilang paglapas sa Republic Act 10591 ug R.A. 9516.
Atol sa ilang pagpang-ronda nakuha sa mga police gikan sa balay sa mga suspect ang usa ka granada, duha ka 45 caliber Pistol magazine ug mga bala.
Ang maong mga suspect gidetain sa CIDG Regional Office sa Camp Evangelista Patag sa wala pa kini pasaka-i sa kaso.
