Pinaagi sa Inquest Proceedings, gipasakaan nag kasong 2 counts of robbery ug illegal possession of explosive sa kapolisan ning syudad ngadto sa City Prosecutors office kagahapon sa hapon ang duha ka mga suspek nga nagtulis sa LBC A. Velez Branch niadtong Dominggo sa buntag.
Si City Director Senior Supt. Nelson Aganon, mipa-ila sa duha ka mga suspek nga silang Rosevelt Bedro, 37 anyos ug si Archonilo Palubon alias “Bingkot” nga pulos taga Ozamis City apan temporaryong nagpuyo sa Buarra, Bayabas ning syudad.
Matud ni Aganon nga wala dangtig 24 oras, ilang nadakpan ang usa sa duha ka mga suspek niadtong Lunes sa buntag sa ilang hide out sa sitio Buarra, Barangay Bayabas.
Maoy nasikop sa mga pulis si Rosevelt Bedro samtang si alias Bingkot ang naka-ikyas sa kamot sa mga otoridad.
Ang pagka sikop sa maong mga suspek pinaagi sa hot pursuit operation nga gilunsad sa kapolisan sukad niadtong 10:30 sa buntag sa Dominggo human ilang gitulis ang LBC sa Divisoria.
Matud ni Aganon nga ang maong mga suspect ilang gi-ila nga sakop sa “Bedro Robbery Gang” ug pulos miyembro sa break away group sa Hold Up Robbery Gang sa Ozamis City.
Sa Press conference kagahapon sa hapon, gipahayag ni Aganon nga gilabay pag granada ni alias Bingkot ang mga pulis nga naglunsad sa ilang Hot Pursuit Operation
“Maayo gani kay wala moboto kay wala man makuha ang pin kay nataranta na tingali to siya sa dihang mi-abot na sa ilang hide out ang atong mga operatives” matud ni Aganon.
Na-recover sa mga police gikan sa hide out sa duha ka mga suspek ang kwatro mil pesos, XRM motorcycle nga gigamit nga gate away vehicle sa moang mga suspek, mga deposit slip sa LBC ug uban pang mga personal nga mga butang.
Lakip sa na-recover sa mga polis ang granada nga gilabay ni Bingkot.
Matud ni Aganon nga ang duha ka mga suspek pulos drug personalities kay daan na silang surrenderee tungod sa Tokhang Operation sa PNP.
Gibutyag ni Aganon nga ilang nadakpan ug na-identify ang duha ka mga suspek pinaagi sa tabang sa Supervisor sa LBC Tagoloan Branch.
Matud ni Aganon nga ang duha ka mga suspek, positibong gi-ila sa Supervisor sa LBC Tagoloan Branch kay sila gihapon ang nagtulis sa LBC Branch sa lungsod sa Tagoloan niadtong Oktubre 6 ug ilang nakuha ang kapin sa 100-thousand pesos.
Gidugang ni Aganon nga samtang at large si Bingot, padayon pa kini karon nga gipangita sa mga pulis.
