Davao City – Patay ang duha ka tawo human gipusil ug gidunggab sa wala pa mailhing mga suspetado sa managlahi nga lugar dinhi sa Siyudad.
On-the-spot patay ang usa ka Jamael Limgas, 30 anyos, minyo, walay trabaho, ug residente sa Phase 2 Dona Mercedes Village, Panacan human gipusil sa nakamotor bandang 11:40 sa gabii niadtong Sabado.
Sa imbistigasyon ni PO2 Roger Rivera II sa Sasa PNP, nagpaabot og PUJ ang biktima gawas sa ilang panimalay aron musundo sa asawa dihang kalit kini gipusil sa suspek nga naka-motor tumong sa liog gamit ang .45 nga pistola resulta sa iyang kamatayon.
Samtang gideklara nga patay sa Southern Philippines Medical Center si Jonathan Orboc, 20 anyos, ug nanimuyo sa Mini-Forest, Barangay 23-C Davao City human giluba sa duha ka batan-on tumong sa liog samtang nagpaabot og Bus sa Isla Verde, Boulevard ning siyudad 3:30 sa kadlawon niadtong Domingo.
Paspas nga nakasibat ang mga suspek samtang daling gidala sa Southern Philippine Medical Center (SPMC) ang biktima apan gidiklara kining patay na.
Giingon sa inahan sa biktima nga mularga unta sila sa Mangagoy, Surigao Del Sur dihang nahitabo ang pagluba-patay kang Jonathan.
Milusad na karon og lalom nga imbistigasyon ang Sta.Ana PNP ug Sasa PNP aron masuta ang motibo sa pagpatay kang Limgas ug Orboc ug aron mailhan ang mga suspetsado nga padayon pang at-large karong panahona.
