Duha nasikop sa Comelec Checkpoint sa illegal nga pagdala-dalag armas

Gitingkagul na sa bilangguan ang duha ka indibidwal, usa ang menor de edad human nga nadakpan sa gipahigayong PNP Comelec Checkpoint sa illegal nga pagdala-dalag armas adtong Miyerkules sa gabie didto sa Purok-7, Sitio San Roque, Barangay Sinanglanan, Malaybalay City.

Gipangunahan sa 1st Bukidnon Police Mobile Force Company (PMFC) ang maong checkpoint nga miresulta sa pagkasikop ni Felix Alvares, 18 anyos, ulitawo, ug residente sa naasoy nga lugar uban sa usa ka menor de edad.

Nakompiska gikan sa mga suspetsado ang usa ka unit sa Colt M1911 kalibre .45 nga pistola, duha ka unit sa steel magazines, 13 ka buhing bala sa kalibre .45, ug usa ka unit sa Euro 150cc nga motorsiklo.

Gidala na sa Malaybalay City Police Station ang mga dinakpang suspetsado samtang giturn-over sa PNP Bukidnon Provincial Forensic Unit ang mga nakompiskang armas alang sa eksiminasyon.

Mag-atubang sa paglapas sa RA 10591 kon ang Illegal Possession of Firearms, Explosive, and Ammunitions ug sa Omnibus Election Code ang mga dinakpang suspetsado.