Davao City – Patay ang duha katao samtang tulo ang samaran sa nahitabong disgrasya tali ten wheeler truck ug six wheeler van sa may national highway, Purok 1, Brgy. Northern Paligue, Padada, Davao del Sur bandang alas 5 kaganinang buntag, August 31, 2018.
Sa report gikan sa Padada PNP, giila ang mga namatay nga sila Alan Guballane Dañolko, driver six wheeler van, 35 anyos ug residente sa Digos City lakip ang helper niini nga si Bryan Espinosa, 38 anyos ug residente sa Carmen, Davao Del Norte kinsa sila gideklarang dead on arrival sa attending physician sa Davao Del Sur Provincial Hospital.
Giila usab ang mga samaran nga sila Dennis Saac, driver sa ten wheeler truck nga taga Camiguin, Cagayan ug helper niining si Mark Dave Babate lakip ang usa pa ka helper sa van nga si Jay Mar Langido Burlas, 31 anyos nga taga San Isidro, Padada, diin sila pulos nakahiagom og samad sa kalawasan hinuon dali silang gidala sa balay-tambalanan.
Sa karon, gidala na sa punerarya ang mga patayng lawas sa biktima samtang ginasuta pa sa kapulisan ang hinungdan sa pagbangga sa duha ka mga sakyanan.
RadyoMaN Renz Barbarona
